Faleminderit Amerikë për kampionin Dvoran, të lutem na na e bëj president

Pas 5 shtatorit, detyrimisht 23 shkurti gjithashtu duhet vendosur në kalendar si festë kombëtare dhe ditë pushimi. Shpallja e gjykatësit Dvoranit “kampion i antikorrupsioni” prej Departamentit Amerikan të Shtetit shoqe në histori ka vetëm shenjtërimin e Nënë Terezës!

Me ngazëllim të parrëfyeshëm mësuam sot se paskësh patur një kampionat botëror kundër korrupsioni. Ama jo lëng groshe, por çmuar nga vendi më demokratik i botës: Amerika!

Kënaqësinë e bën më të ëmbël ndershmëria e gjykimit të arbitrit . Departamenti Amerikan nuk ka mbajtur me hatëre vende të mëdha e me peshë si Gjermania, Ingliterra apo Rusia, Brazili, Zvicra… Jo mor jo! Nga Shqipëria, Ekuadori, Mikronezia, Guatemala, Guinea, Kirgistani, Sierra Leone etj i ka zgjedhur MË TË MIRËT ( ku hyn me lavdi edhe gjukatësi ynë!)

E marr me mend sa e zorrçme ka qenë për Shqipërinë! Se kur në një vend ke vetëm një a dy që lëftojnë me të keqen është kollaj fare! Ama mes një populli ku i madh e i vogël ka 30 vjet me dajak në dorë kundër korrupsionit… për besë të zinjtë e ullirit kanë hequr amerikanët në këtë kampionat për të pikasur më të mirin, them unë!!

Korrupsionit iu qep Saliu, vazhdoi Fatosi, u kthye Saliu, e vazhdon Edi, Iliri, Erioni, Monika, Prokuroria, (policia po se po!) Gjukatat, mjekët… mor i madh e i vogël!!

Ma do mendja që një punë të madhe do ketë bërë ambasada këtu! E , po të qe për mua, kampionatin, para Dvoranit, ja jepja pa fjalë Ambasadës së ShBA në Tiranë!! Ata bënë reformën në drejtësi, leri llafet!!
…. Vetëm se mbase nuk vete që Amerika të shpallë Ambasadën e saj në Tiranë “kampione të antikorrupsionit” në Shqipëri.

Unë, në emër të bashkëatdhetarëve ende të mbetur në Shqipëri, i shpreh mirënjohjen më të thellë Amerikës për këtë vlerësim dhe i lyp me përunjësi të na bëjë edhe një nder! E bëre që e bëre… a s’na e vë President këtë kampionin? Ky kadi është. Le të bëhet edhe vali. Natyrisht, ne nuk jemi koloni dhe i kzgjedhim vetë institucionet dhe autoritetet. Por një fjalë e mirë që andejzaj, mund t’i shtinte ndërmend punëra të mira devletit tonë sovran!