Edi Rama vazhdon që të sillet me çështjen e korrupsionit galopant që ka instaluar vetë në të gjithë piramidën e shtetit gjatë këtyre 8 viteve, njësoj si ajo shprehja “Enveri nuk dinte gjë…”.
Ndërkohë që SPAK po vazhdon një valë arrestimesh dhe hetimesh të zyrtarëve të shtetit të akuzuar për korrupsion, kryeministri prej disa ditësh ka nisur një fushatë paralele, duke u shfaqur sikur është ai që do ta luftojë korrupsionin dhe për këtë ka edhe plane
Pas takimeve me kryebashkiakët dhe ministrat e tij, të cilët i mësoi se sit ë bëjnë letrat e tendera tani e tutje, por edhe i kërcënoi si të ishte agjenci ligj-zbatuese e jo pjesë e problemit, Rama është marrë me korrupsionin edhe gjatë një takimi me mjekë me rastin e nisjes së punimeve për spitalin “Mbretëresha Geraldinë”.
Dhe kjo-vazhdoi ai me planin e tij- jashtë sistemit të drejtësisë!
“Ne jemi në proces të ndërtimit të një rrjeti antikorrupsion, në të gjithë sistemin tonë publik. Kjo do të jetë vetëm nga ana jonë, jo ai i drejtësisë. Kjo është arsyeja që edhe në spitale do të shtrijmë deri në fund, si në të gjitha institucionet, rrjetin e individëve që do të jenë aty vetëm për këtë punë, për të ndarë dhe për të kontribuar në ndarjen e të njomit nga i thati. Lufta do të bëhet brenda. Vetëm kështu rriten të ardhurat, vlerësimit, dinjiteti dhe respekti”, tha Rama.
Faktikisht me këtë deklaratë dhe shmangien e institucioneve të reja të drejtësisë të krijuara enkas për luftën kundër korrupsionit siç është SPAK, Rama po krijon struktura paralele. Pra qeveria për propagandë a për të fshehur gjurmët, është duke krijuar SPAK-un e vet.
Gjithashtu kryeministri Rama e ka konsideruar si shokues deklaratën pak ditë më parë të një mjeku në Spitalin e Traumës i cili kërkoi legalizim të bakshishit në sistemin e drejtësisë përderisa shteti nuk ka fuqi të rrisë rrogat e punonjësve me bluza të bardha.
Duke komentuar Rama tha se kjo vërteton edhe domosdoshmërinë e lëvizjes së re të qeverisë kundër korrupsionit.
“Një mjek që kërkonte legalizimin e ryshfetit. Është vërtet mbresëlënës për nga niveli i kurajos dhe për nga paturpësia e propozimit. Patjetër që niveli i shpërblimit të mjekëve duhet rritur dhe ne do ta rrisim ashtu sikundër e kemi rritur. Është një zotim që ne e kemi bërë që pagat për bluzat e bardha të rriten 40%. Të paguhen edhe sipas mundit, volumit dhe cilësisë së shërbimit që bëjnë individualisht. Të thuhet që ka ardhur koha të legalizojmë ryshfetin është vërtet një mesash kuptimplotë për domosdoshmërinë e lëvizjes antikorrupsion në të gjithë sistemin tonë shtetëror që ka filluar të ndihet edhe më thellë. Nuk mund të ketë barazi për të gjithë bluzat e bardha se ‘të gjithë janë njësoj’ dhe të gjithë fusin duart në xhepat e pacientëve. Kjo nuk është e vërtetë”, tha Rama.
