Kandidatja për deputete e Partisë Demokratike në Tiranë, Albana Vokshi gjatë një takimit me banorët në njësinë numër 9, në kuadër të fushatës elektorale të 25 Prillit, theksoi se në disa rrugë është hedhur asfalt elektoral, çka përbën një krim zgjedhor.
Vokshi i bëri apel Prokurorisë së Posaçme kundër Korrupsionit dhe Krimit të Organizuar (SPAK), që të hetojë këtë krim zgjedhor , ndërsa theksoi se Rama, Manastirliu dhe Veliaj duhet të shkojnë përpara drejtësisë.
“Ftoj SPAK të hetojë pa vonesë këtë shkelje të ligjit, që dënohet nga 1 deri në 5 vjet burg. Ftoj qytetarët që në 25 Prill të dalin e të votojnë për ndryshimin, në mënyrë që çdo abuzues, duke nisur nga Edi Rama, Ogerta Manastirliu, Erion Veliaj dhe kushdo të shkojnë para drejtësisë”- u shpreh Albana Vokshi.
Kandidatja për deputete, cila renditet e 4-ta në listën e Tiranës theksoi se asfalti nuk përmirëson jetesën, pasi edhe banorët shprehen se ky investom ka bllokuar rrjetin e kanalizimeve në këtë zonë.
“Ky është një krim elektoral. Pas 8 vjet qeverisje të dështuar të Edi Ramës, qytetarët e kanë kuptuar se ky asfalt elektoral nuk u përmirëson jetesën, por siç thanë edhe banorët, ka sjellë më shumë probleme nga bllokimi i kanalizimeve”- theksoi Vokshi.
Kujtojmë që Kodi Zgjedhor i ndalon punime të tilla gjatë fushatës elektorale duke filluar nga 25 marsi deri më 25 prill.
Sipas Albana Vokshi përgjegjës për këtë situatë si në njësinë 9 edhe në njësinë 11 janë kandidatët e PS Ogerta Manastirliu, Ulsi Manja dhe drejtuesit politikë Edi Rama dhe Erion Veliaj që mbështesin dhe nxisin një politikë të tillë mashtruese për qytetarët.
